Para Kay B ni Ricky Lee

Nabasa mo na ba?Kung ibabase sa konti kong nabasa sa mga akda ni Ricky Lee (at isama na rin ang ilang pelikula), masasabi kong hindi pamilyar sa akin ang nobelang “Para Kay B” (2008 pa ito nalathala). Hindi ko agad masasabing si Ricky Lee ang sumulat nito. Pero dahil ayoko namang maging kritiko ng una niyang nobela, iiwasan kong magkumpara. Basta ang una ko lang reaksyon nang buklat-buklatin ko ang libro: aba, pinasok na rin ni Ricky Lee ang genre ng pagpapatawa! Ano ba’ng dapat kong asahan dito?

Lalo itong pinatotohanan ng ikalawa niyang nobela na ipinakilala niya sa pahina 244, “Si Amapola sa 65 na Kabanata”, lumabas 2011, tungkol sa isang baklang manananggal na magiging tagapagligtas ng Pilipinas (may kopya rin ako). Gayunman, may mga bagay na hindi nawawala (at hindi mawawala) sa gawang Ricky Lee: ang matalas na sensibilidad at matibay na hawak sa realismong Filipino. Manaka-naka, pabugso-bugso, pasilip-silip ito sa maraming bahagi ng nobela. Sa limang kwentong nakapaloob dito, hindi laging nagpapatawa si Ricky Lee, halimbawa, sa kwento ni Sandra. Sa kanya unang binuksan ng Writer (isa rin sa mga tauhan) ang kanyang teorya tungkol sa pag-ibig. Sabi niya: “Me quota ang pag-ibig. Sa bawat limang umiibig, isa lang ang magiging maligaya.”

Hindi rin uli nagpapatawa si Ricky Lee sa ikalimang kwento, tungkol kay Bessie. Si Bessie naman ang… oops! Unfair naman sa mga hindi pa nakabasa. At kagaya rin ni Sandra, hindi ako kumbinsido sa teorya ng Writer. Gayunman, maganda itong pag-usapan at hanapan ng ebidensya. Nang magwala na mula sa katinuan ng Writer ang limang pangunahing tauhan (Irene, Sandra, Erica, Ester at Bessie), ang talagang naramdaman ko – si Ricky Lee ang gustong kumawala (Ayan! Ayan na si idol!).

Basta ang sigurado ko, pamilyar ka man o hindi kay Ricky Lee, hindi mo babasta-bastahin ang nobelang “Para Kay B”. NABASA MO NA BA?

Sa sunod na lang ang tungkol kay Amapola ha?

243 pages
Inilathala 2013 ng Writers Studio Philippines, Inc.

orihinal na pamagat: Para Kay B (o kung paano dinevastate ng pag-ibig ang 4 out of 5 sa atin)
ISBN: 978-971-94307-0-4
wika ng edisyon: Filipino

Layunin ng “NBSMoNB? Mini-rebyu ni Mano” na ipakilala sa ating mga mambabasa ang napakaraming akdang walang pagod na sinusulat ng ating mga manunulat na hindi halos nababasa sa labas ng mga pamantasan at mga sirkulong pampanitikan. Isa itong personal na panawagan sa ating mga kababayan na tangkilikin (at unahin) ang sariling literatura bago ang iba. Huwag nating hintaying magkatotoo sa atin ang sinabi ng dayuhang awtor na si Ray Bradbury na “hindi mo kailangang magsunog ng mga aklat para lipulin ang isang kultura – ang kailangan lang ay huwag na itong basahin ng mga tao.”