NBSMoNB?

Si Amapola sa 65 na Kabanata ni Ricky Lee

0
(0)

Isang nilalang ang iniluwal ng maulap na guniguni ng henyong si Ricky Lee: isang baklang manananggal na nakaisplit pati ang personality, na itinalagang maging tagapagligtas ng Pilipinas. “Iligtas mula saan?” tanong ni Amapola.

Sa mga hindi pa nakabasa, ihanda n’yo ang sarili sa pagtawang mag-isa. Naiimadyin ko na nga itong isang pelikula na pagbibidahan ng sikat na sikat na artistang baklang itago natin sa initials na V. G. Makikita, maririnig at maaamoy mo ang pasikot-sikot ng Morato sa nobelang ito. Makikini-kinita mong papaga-pagaspas sa itaas niyon si Amapola, ang hanggang sa huling pahina ay pinaka-awkward na superherong namutawi sa imahinasyon ng isang manunulat, habang hindi magkandatuto sa pagliligtas sa mga kababayang aniya’y “di nauubusan ng mga bagong paraan ng pagdurusa.”

Kahit nagpapatawa, dikit na dikit pa rin sa realismo ang nobela, na kailanma’y hindi na maiiwan ni Lee sa kanyang mga akda. Ito na ang linya niya, kahit anupamang mauso sa literatura. Hindi na rin bago ang langkapang ito, dahil matagal nang kasangkapan ng pagmumulat ang panunudyo. Dinadamitan natin ng biro ang kabalintunaan ng ating pag-iral (existence). Tumatawa tayo kapag nasasaktan tayo. Dahil hindi natin masugpo ang mga pesteng sanhi ng ating mga paghihirap, pinagtatawanan na lang natin sila.

Siguro, iyon din ang nasa isip ni Lee nang bigyan niya ng pagkatao (pagkaaswang) si Amapola. Ano kaya kung may mga aswang sa Morato? Ganu’n na nga yata kasahol ang kalagayan ng sangkapilipinuhan. Anong klaseng gutom ang dinanas ng awtor para maisip niyang isang manananggal (at hindi maraming manananggol) ang sagot sa ating mga problema? Hinihigit niya nang todo, parang lastiko, ang ating imahinasyon para mag-isip pa. Magsuggest kayo ng iba! Hindi na ba kaya ni Darna?

Ang hindi ko masasabi ay kung ano’ng nangyari sa huli dahil baka batukan na ako ni Lee.

NABASA MO NA BA?

Inilathala 2011 ng Philippine Writers Studio Foundation, Inc.
orihinal na pamagat: Si Amapola sa 65 na Kabanata
ISBN: 9789719430728
wika ng edisyon: Filipino
364 pahina

Nagustuhan mo ba? (Did you like this post?)

Click on a star to rate it!

Average rating 0 / 5. Vote count: 0

No votes so far! Be the first to rate this post.

As you found this post useful...

Please share on social media!

We are sorry that this post was not useful for you!

Let us improve this post!

Tell us how we can improve this post?

Isinilang noong Oktubre 1972 sa maburol na bayan ng Ibaan sa lalawigan ng Batangas, si Manolito C. Sulit ay awtor ng IBANG DAAN PAUWI (mga tula), NANG TAYO'Y MATUBOS (mga tula), MARTIAL LAW KID (nobela), at BARAKO (pelikula). Umaasa siyang masulat ang lahat ng nobelang nasa isip niya sa nalalapit niyang ginintuang panahon at hangga't ipinahihintulot ng Maykapal.

Leave a Comment

error: Content is protected !!